Bethi Gee - 2026

2025 - රැස්වීම් දිනයන්

හැඳින්වීම

කොට්ඨාශය පිළිබද  තොරතුරු

දකුණු පළාතේ ගාල්ල දිස්ත්‍රික්කයේ ප්‍රාදේශීය ලේකම් කොට්ඨාස දහනවයෙන් සුවිශේෂී වු ප්‍රාදේශීය ලේකම් කොට්ඨාසයක් ලෙස බෝපෙ පෝද්දල ප්‍රාදේශීය ලේකම් කොට්ඨාසය හැඳින්විය හැකිය. දිස්ත්‍රික්කයේ භූමි ප්‍රමාණයෙන්  සියයට දෙකක් (2%) ක් හිමිවන මෙම කොට්ඨාසය වර්ග කිලෝ මීටර තිස්පහයි දශම හයක (35.6) විශාලත්වයකින් හා හෙක්ටයාර් තුන්දහස් පන්සිය හැටක (3,560) භුමි ප්‍රමාණයකින් සමන්විත වේ.

අක්මීමණ මැතිවරණ කොට්ඨාසයේ බටහිර කොටසට අයත් වන බෝපෙ පෝද්දල ප්‍රාදේශීය ලේකම් කොට්ඨාසය උතුරින් හා ඊසාන දෙසින් බද්දේගම ප්‍රාදේශීය ලේකම් කොට්ඨාසය හා ගිං ගඟ ද  නැගෙනහිරින් හා ගිනිකොණ දෙසින් අක්මීමණ ප්‍රාදේශීය ලේකම් කොට්ඨාසයට ද දකුණින් හා බටහිර දෙසින් කඩවත් සතර ප්‍රාදේශීය ලේකම් කොට්ඨාසයට ද  මායිම් වේ. 

උතුරු අක්ෂාංශ 6-3 සිට 5-7 දක්වා ද නැගෙනහිර දේශාංශ 80-11-15 අතර පිහිටා ඇත. නිරිත දිග පහත් බිම් වලට අදාළ දේශගුණික ලක්ෂණවලින් හෙබි මෙම කොට්ඨාසයේ උෂ්ණත්වය සෙන්ටිග්‍රේඩ් අංශක විසි හතයි දශම තුනයි එකකින්  (27.31) යුක්ත වන අතර නිරිත දිග මෝසමින් වැඩි වර්ෂාපතනයක් ලැ‍බේ.

ග්‍රාම නිලධාරී වසම් හතලිස් හතරකින් සමන්විත වන මෙම කොට්ඨාසයේ ප්‍රධාන පරිපාලන මධ්‍යස්ථානය ලෙස බෝපෙ පෝද්දල ප්‍රාදේශීය මහ ලේකම් කාර්යාලය කටයුතු කරයි. ලබුදූව රජයේ ගොවිපල, විවෘත විශ්ව විද්‍යාලය, සිරිධම්ම විද්‍යාලය, ලබුදූව උසස් තාක්ෂණ ආයතනය, කෘෂිකර්ම විද්‍යාලය, ගොවිජන සේවා මධ්‍යස්ථානය, පොල් සංවර්ධන මණ්ඩලය, ඉංජිනේරු පීඨය, රුහුණු වෛද්‍ය පීඨය, රුහුණු (‍පෞද්ගලික) රෝහල, දක්ෂිණපාය පළාත් අමාත්‍ය සංකීර්ණය,රජයේ පශු වෛද්‍ය කාර්යාලය,සුළු අපනයන කෘෂිකර්ම දෙපාර්තමේන්තුව ආදී වැදගත් ආයතන රැසක් මෙම කොට්ඨාසයේ පිහිටා ඇත. එසේම ගාල්ල ප්‍රධාන මාතෘ රෝහල ද මෙම කොට්ඨාසය තුළ ඉදිවෙමින් පවතී.    

 මෙම කොට්ඨාසයේ කෘෂි කර්මාන්තය සහ වෙනත් වගාවන් පිළිබඳ අවධානය යොමු කරද්දී වැඩි භූමි ප්‍රමාණයක් කෘෂි කර්මාන්තය සඳහා යොදවා ඇත.මෙයට අමතරව වී, පොල් , රබර්, එළවළු හා පලතුරු මෙන්ම සුළු අපනයන බෝග වගාවන්හි ද නිරත වේ.

2018 දී මුළු ජනගහනය 54377න් වැඩි අගයක් වන්නේ ස්ත්‍රී ජනගහනයයි. එය 28337ක් වේ . (52.11%) පුරුෂ  ජනගහනය 26040  (48.89%) ක් ලෙසත් වාර්තා වි ඇත. 2018  සංඛ්‍යා ලේඛන තොරතුරුවලට අනුව කොට්ඨාසයේ  ජනඝනත්වය වර්ග කිලෝමීටරයකට 1527 කි.

දරුවන්ගේ නැණ නුවණ පෑදීම සඳහා පාසල්  14ක් හා දහම් පාසල් 19ක් ද මුල් ළමාවිය සංවර්ධන මධ්‍යස්ථාන 36ක් ද කොට්ඨාසය තුළ පිහිටා ඇත.

රාජ්‍ය හා පෞද්ගලික අංශයෙහි සේවයෙහි නිරත වන ජන පිරිස් මෙන්ම වෘත්තීයමය රැකියා වශයෙන් පෙදරේරු, වඩු, විදුලි කාර්මික, කැටයම් ,මෝටර් රථ කාර්මික,  ලී කැටයම් ආදි විවිධ ක්ෂේත්‍රයන් පුරා විහිදුනු ස්වයං රැකියාවන්හි නිරත ජන පිරිස් ද මෙම කොට්ඨාසයේ ජීවත් වෙති.

රජයේ කාර්යභාරය ඉටු කිරීමේ ප්‍රාදේශීය නියෝජිතයා ලෙස කටයුතු කරන ප්‍රාදේශීය මහ ලේකම් කාර්යාලය පුරවැසියෙකුගේ උපතේ සිට මරණය දක්වා වු සෑම අවශ්‍යතාවයක්ම ඉටු කිරීමේ කාර්යය භාරයේ පුරෝගාමියා වේ. එම කාර්යය ඉටු කිරීමේ දී ශ්‍රී ලංකා පරිපාලන ‍සේවයේ  I වන පන්තියේ නිලධාරියෙකු  ප්‍රාදේශීය ලේකම් වශයෙනුත් එම සේවයේ ම  III  පන්තියේ නිලධාරිනියක සහකාර ප්‍රාදේශීය ලේකම් වශයෙන් ද ගිණුම් කටයුතු සඳහා ශ්‍රී ලංකා ගණකාධිකාරී සේවයේ නිලධාරිනියක ගණකාධිකාරී වශයෙන් ද සංවර්ධන කටයුතු සඳහා ශ්‍රී ලංකා ක්‍රමසම්පාදන සේවයේ නිලධාරියෙකු සහකාර අධ්‍යක්ෂ (සැලසුම්) ලෙස ද ආයතන කටයුතු සහ පරිපාලන කටයුතු සඳහා පරිපාලන නිලධාරිනියක් ද ග්‍රාම නිලධාරීන්ගේ පරිපාලන කටයුතු  සඳහා පරිපාලන ග්‍රාම නිලධාරීවරයෙක් ද ඇතුළුව බෝපෙ පෝද්දල ප්‍රාදේශීය මහ ලේකම් කාර්යාලයේ සමස්ථ කාර්ය මණ්ඩලය දෙසිය අනූ හයකි.

 ආයතනයේ විකාශනය

ගාල්ල කඩවත් සතර ප්‍රාදේශීය ආදායම් නිලධාරි (DRO) කාර්යාලය 1974 වර්ෂයේ දී සේවා සැපයීමේ පහසුව සදහා බෝපෙ පෝද්දල හා අක්මිමණ වශයෙන් තවත් කොටස් දෙකකව වෙන් කර ඇත. ග්‍රාම නිලධාරි වසම් 44 කින් සමන්විත වූ  බෝපෙ පොද්දල සහකාර ආණ්ඩුවේ ඒජන්ත කාර්යාලය එවකට ප්‍රදේශයේ දානපතියකු වූ එච්.ඩබ්.අමරසූරිය මැතිතුමාට අයත් වූ නිවසක ස්ථාපනය කරන ලදී. සිවිල් සේවයේ දිර්ඝ කාලයක් සේවය කොට අමාත්‍යාංශ ලේකම් වරයකු වශයෙන් විශ්‍රාම ලැබූ විජයානන්ද එල්ලාවල මහතා මෙහි සහකාර ආණ්ඩුවේ ඒජන්තවරයා විය 

1972 වසරේ සිට සේවය කල ප්‍රාදේශිය ලේකම්වරුන්